‘పెద్ది’ కోసం బీస్ట్ మోడ్ ఆన్!
గ్లోబ‌ల్ స్టార్ రామ్ చరణ్ ప్రస్తుతం బుచ్చిబాబు దర్శకత్వంలో తెరకెక్కుతున్న పీరియాడిక్ స్పోర్ట్స్ మాస్ యాక్షన్ డ్రామా ‘పెద్ది’ సినిమాలో నటిస్తున్నాడు. ఇప్పటికే విడుదలైన గ్లింప్స్, పోస్టర్లతో భారీ అంచనాలు నెలకొల్పిన ఈ సినిమా, చెర్రీ కెరీర్‌లో మరో మైలురాయిగా నిలవనుందని ఫ్యాన్స్ భావిస్తున్నారు.
తాజాగా చరణ్ తన ఇన్‌స్టాగ్రామ్‌లో షేర్ చేసిన ఫోటో సోషల్ మీడియాను ఊపేస్తోంది. 'చేంజ్ ఓవర్ ఫర్ పెద్ది. ప్యూర్ గ్రిట్.. ట్రూ జాయ్' అనే క్యాప్షన్‌తో పోస్ట్ చేసిన ఆ ఫోటోలో చెర్రీ గుబురు గడ్డంతో, రఫ్ హెయిర్ స్టైల్‌లో, సిక్స్ ప్యాక్ బాడీతో బీస్ట్‌లా కనిపిస్తూ హాలీవుడ్ హీరోల్ని తలపిస్తున్నాడు. మెగా ఫ్యాన్స్ ఈ ఫోటోకి 'బీస్ట్ మోడ్ ఆన్' అంటూ సోషల్ మీడియాలో కామెంట్ల వర్షం కురిపిస్తున్నారు.
ఈ చిత్రంలో చెర్రీ సరసన జాన్వీ కపూర్ హీరోయిన్‌గా నటిస్తుండగా, శివరాజ్ కుమార్, జగపతిబాబు, దివ్యేందు శర్మ కీలక పాత్రలు పోషిస్తున్నారు. ఆస్కార్ విజేత ఏ.ఆర్. రెహమాన్ సంగీతం అందిస్తుండటం ఈ సినిమాకి మరో హైలైట్‌.
మైత్రి మూవీ మేకర్స్, సుకుమార్ రైటింగ్స్ లతో కలిసి వృద్ధి సినిమాస్ బ్యానర్ పై వెంకట సతీశ్ కిలారు ఈ చిత్రాన్ని ప్రతిష్టాత్మకంగా నిర్మిస్తున్నారు. ప్రస్తుతం ఈ సినిమా షూటింగ్ వేగంగా కొనసాగుతోంది. 2026 మార్చి 27న, చెర్రీ పుట్టినరోజు సందర్భంగా 'పెద్ది' గ్రాండ్‌గా రిలీజ్ కానుంది.