పురాణీ హవేలీకి కొత్త చరిత్ర – కోత్వాల్ భవన ఆవిష్కరణ

హైదరాబాద్ పాతబస్తీలోని పురాణీ హవేలీ వద్ద ఉన్న 150 ఏళ్ల పురాతన కోత్వాల్ కార్యాలయం కొత్త జీవం పొందింది. ఇతిహాసిక నిర్మాణంగా నిలిచిన ఈ భవనం, నేటి నుండి అధికారికంగా ప్రజలకు అందుబాటులోకి రానుంది. నాలుగేళ్ల క్రితం పైకప్పు కూలిపోవడంతో కూల్చివేతకు సిద్ధంగా ఉన్న ఈ భవనాన్ని, వారసత్వంగా కాపాడాలని హైదరాబాద్ పోలీస్ కమిషనర్ సీవీ ఆనంద్‌ IPS గారు ప్రత్యేక కృషి చేశారు.

నగర వారసత్వాన్ని సంరక్షించాలనే సంకల్పంతో, సీవీ ఆనంద్‌ గారు 2022 డిసెంబర్‌లో పునరుద్ధరణ పనులను ప్రారంభించారు. ఈ కార్యక్రమానికి గ్రీన్‌కో సంస్థ CMD శ్రీ అనిల్ గారి విరాళ సాయంతో ప్రణాళికలు ముందుకు సాగాయి. అయితే 2023 అక్టోబరులో ఆనంద్ గారి బదిలీతో పనులు తాత్కాలికంగా నిలిచిపోయాయి.

2024 సెప్టెంబర్‌లో ఆయన తిరిగి కమిషనర్‌గా బాధ్యతలు చేపట్టిన వెంటనే, కోత్వాల్ భవనం పునరుద్ధరణ పునఃప్రారంభమైంది. దీన్ని డెక్కన్ టెర్రెయిన్ ఏజెన్సీస్‌కి చెందిన మిర్ ఖాన్ ఆధ్వర్యంలో నిపుణంగా, శ్రద్ధగా నిర్మించారు. సవాలుతో కూడిన ఈ కట్టడాన్ని ఎంతో నైపుణ్యంగా పునఃస్థాపించినందుకు ఆయనను పలువురు ప్రశంసించారు.

ఈ భవనం హైదరాబాద్ పోలీసింగ్ చరిత్రలో ఓ ప్రత్యేక స్థానం పొందింది. పాతబస్తీకి వచ్చే కోత్వాల్‌కు ఇప్పుడు గౌరవప్రదమైన కార్యాలయం సిద్ధమైంది అని సీవీ ఆనంద్‌ IPS గారు చెప్పారు.

ఈ పునరుద్ధరణ భవనాన్ని నిన్న (జులై 09) రాష్ట్ర రవాణా శాఖ మంత్రి పొన్నం ప్రభాకర్ గారు, AIMIM అధినేత అసదుద్దీన్ ఒవైసీ గారు జాతీయ పతాకాన్ని ఆవిష్కరించి ప్రారంభించారు.ఈ కార్యక్రమంలో హైదరాబాద్ పోలీస్ కమిషనర్ సీవీ ఆనంద్‌ IPS, ఇతర సీనియర్ ఐపిఎస్ అధికారులు కూడా హాజరయ్యారు.

ప్రస్తుతం నూతనంగా రూపుదిద్దుకున్న కోత్వాల్ కార్యాలయం, నగర సంస్కృతి, పరిపాలనా వారసత్వానికి ప్రతీకగా అభిమానం పొందుతోంది.

New history for Purani Haveli – Kotwal Bhavan unveiled