ఈ వారం బాక్సాఫీస్ సందడి!

ఏప్రిల్ చివరి వారం తెలుగు సినిమాల కోసం వాస్తవికంగా ఒక పరీక్షల సీజన్ లాంటిది. ఒకవైపు ఎండలు, మరోవైపు ఐపీఎల్ క్రికెట్ హడావుడి – ఈ కఠినమైన పోటీ పరిస్థితుల్లో ప్రేక్షకులను థియేటర్లకు రప్పించేందుకు సినిమాలు దూకుడు పెంచుతున్నాయి.

గత వారం భారీ అంచనాల మధ్య రిలీజ్ అయిన 'అర్జున్ S/O వైజయంతి', 'ఓదెల 2' ఆశించిన స్థాయిలో ఆకట్టుకోలేకపోవడంతో, ఈ వారపు సినిమాల మీద బయ్యర్లకు, ప్రేక్షకులకు కొత్త ఆశలు నెలకొన్నాయి. ప్రియదర్శి హీరోగా, ఇంద్రగంటి మోహనకృష్ణ డైరెక్షన్‌లో రూపొందిన 'సారంగపాణి జాతకం' కామెడీ ఇష్టపడే ప్రేమికుల దృష్టిని ఆకర్షిస్తోంది.

ప్రమోషనల్ కంటెంట్ బాగుండటం, సక్సెస్ కోసం సరైన మిక్స్ ఉన్నట్టే కనిపిస్తోంది. ఈ సినిమాలో ప్రియదర్శితో పాటు మరో ఇద్దరు కామెడీ స్టార్స్ వెన్నెల కిషోర్, వైవా హర్ష కూడా కీ రోల్స్ లో సందడి చేయబోతున్నారు. ప్రియదర్శికి జోడీగా రూప కొడువాయూర్ నటించింది. 'సారంగపాణి జాతకం' ఏప్రిల్ 25న ఆడియన్స్ ముందుకు వస్తోంది.

'చౌర్య పాఠం' ద్వారా దర్శకుడు త్రినాథరావు నక్కిన నిర్మాతగా మారాడు. ట్రైలర్ చూస్తే ఇదొక వినూత్నమైన ఫన్ రైడ్ అనిపిస్తోంది. కంటెంట్ బలంగా ఉంటే మౌత్ టాక్‌తో సక్సెస్ అందుకోవచ్చని ట్రేడ్ వర్గాలు భావిస్తున్నాయి.

ఈ వారం పలు డబ్బింగ్ సినిమాలు, రీ రిలీజులు ఆడియన్స్ ముందుకు వస్తున్నాయి. డబ్బింగ్ విషయానికొస్తే మలయాళం నుంచి మోహన్ లాల్ 'తుడరుమ్' ఏప్రిల్ 25న వస్తోంది. అలాగే ఇప్పటికే మలయాళంలో హిట్ సాధించిన 'జింఖానా' సినిమా 'ప్రేమలు' తరహాలో హిట్ కొట్టేందుకు వచ్చేస్తోంది.

రీరిలీజుల విషయానికొస్తే మహేష్ బాబు 'ఒక్కడు, భరత్ అనే నేను', రజనీకాంత్ 'బాషా' వంటి చిత్రాలు ఈ వారం రీ రిలీజు రూపంలో విడుదలకు ముస్తాబవుతున్నాయి. మొత్తంగా ఈ వారం వస్తోన్న సినిమాలలో ఏ ఏ చిత్రాలు బాక్సాఫీస్ వద్ద ఎలాంటి ప్రభావాన్ని చూపిస్తాయో చూడాలి. మరోవైపు వచ్చే వారం మే 1న నాని 'హిట్ 3' రంగంలోకి దిగబోతుంది.