"ఇంటింటికీ జనసేన" కార్యక్రమానికి రంగం సిద్ధం

ఆంధ్రప్రదేశ్ రాష్ట్ర ఉప ముఖ్యమంత్రిగా కొనసాగుతున్న పవన్ కళ్యాణ్ గారు, ఇప్పుడు పూర్తిగా జనసేన పార్టీ బలోపేతం వైపు దృష్టి పెడుతున్నారు. సెప్టెంబర్ నుంచి పార్టీకి పూర్తిగా సమయం కేటాయించాలని నిర్ణయం తీసుకున్నారు. ఇది పార్టీకి దిశానిర్దేశకమైన మెరుగైన ప్రారంభంగా చెప్పొచ్చు. ప్రస్తుతం జనసేన పార్టీ గెలిచిన 21 నియోజకవర్గాల్లో పార్టీకి ఎంత బలం ఉందో విశ్లేషించారు. దీనితో పాటు, రాష్ట్రవ్యాప్తంగా మరో 60 నియోజకవర్గాల్లో గుప్త సర్వేలు చేయించారు. ఈ సర్వేల ద్వారా పార్టీకి బలం ఉన్న 50-60 స్థానాలను ఇప్పటికే గుర్తించారు.

ఇది పార్టీ స్థిరత్వానికి ఒక బలమైన ఆధారం.జనసేనాని త్వరలోనే ప్రతి జిల్లాలో పర్యటించాలనే ఆలోచనలో ఉన్నారు. ఈ పర్యటనల్లో భాగంగా, ప్రతి జిల్లాకు ఓ నూతన జిల్లా అధ్యక్షుడిని నియమించనున్నారు. దీని ద్వారా పార్టీకి గ్రామస్థాయిలోనూ, మండల స్థాయిలోనూ నాయకత్వం నిలబడేలా మార్గదర్శకాలు సూచిస్తున్నారు.

పార్టీ శ్రేణులను ఉత్సాహపరిచే విధంగా “ఇంటింటికీ జనసేన” కార్యక్రమాన్ని ప్రారంభించాలనే ఆలోచనలో పవన్ కళ్యాణ్ గారు ఉన్నారు. దీని ద్వారా ప్రజలతో నేరుగా సంబంధం ఏర్పడుతుంది అనే అభిప్రాయంలో జనసేన సంకల్పాలను, పార్టీ ఆశయాలను ఇంటికింటికి తెలియజేయాలనే ఉద్దేశంలో ఉంది జనసేన కార్యవర్గం.

జనసేన పార్టీ ప్రస్తుతం ఎన్డీఏ కూటమిలో భాగంగా కొనసాగుతోంది. అయితే కూటమిలో ఉన్నప్పటికీ, జనసేన పార్టీకి స్వతంత్ర శక్తిని పెంచేందుకు పవన్ కళ్యాణ్ వ్యూహాలు రచిస్తున్నారు. మిత్రపక్షాలతో కలిసి పనిచేస్తూనే, పార్టీకి ప్రత్యేక గుర్తింపు రావాలని చూస్తున్నారు.

ఇటీవల ఇచ్చిన వ్యాఖ్యల్లో పవన్ కళ్యాణ్ గారు రాజకీయాలకే ఎక్కువ ప్రాధాన్యతనిచ్చారు. సినిమా రంగాన్ని కొంతమేర వెనక్కి నెట్టాలని, ఇకపై పూర్తిగా ప్రజాసేవపై కేంద్రీకృతం కావాలనుకుంటున్నట్లు చెప్పారు. ఇది పార్టీకి పూర్తిస్థాయి నాయకత్వం అందించేందుకు తీసుకున్న కీలక నిర్ణయంగా చెప్పవచ్చు.

ఈ విధంగా చూస్తే, పవన్ కళ్యాణ్ గారు పార్టీకి బలమైన పునాది వేస్తున్నారు. ఆయన తీసుకుంటున్న చర్యలు, సర్వేలు, పర్యటనలు, మున్ముందు పార్టీని మరింత బలంగా, ప్రజలలో నమ్మకంగా నిలపడానికి మార్గం సిద్ధం చేస్తునట్టు తెలుస్తుంది.