ఢిల్లీలో తెలుగు రాష్ట్రాల ముఖ్యమంత్రుల భేటీ

ప్రస్తుతం దేశ రాజధాని ఢిల్లీలో శ్రమశక్తి భవన్ వేదికగా రెండు తెలుగు రాష్ట్రాల ముఖ్యమంత్రులు ఏపీ సీఎం నారా చంద్రబాబు నాయుడు,తెలంగాణ సీఎం రేవంత్ రెడ్డి కేంద్ర జలశక్తి శాఖ మంత్రి హెచ్‌ఆర్ పాటిల్ సమక్షంలో కీలక సమావేశంలో పాల్గొంటున్నారు. ఈ భేటీ రాష్ట్రాల మధ్య ఎంతో కాలంగా కొనసాగుతున్న జలవనరుల పంపకాల వివాదాలకు పరిష్కారం దొరకబోతుందనే ఆశలు రేకెత్తిస్తోంది.

తెలంగాణ ప్రభుత్వం ఇప్పటికే బనకచర్ల ప్రాజెక్టుపై చర్చ అవసరం లేదని కేంద్రానికి లేఖ రాసిన నేపథ్యంలో, ఆ అంశంపై నేటి సమావేశంలో చర్చ జరుగుతుందా అన్నది అనిశ్చితంగా ఉంది. అయితే కృష్ణా, గోదావరి నదులపై జలాల లభ్యత, వాటి పంపకాలు, నదీ జలాలపై నిర్మాణంలో ఉన్న ప్రాజెక్టుల గురించి మాత్రం విస్తృతంగా చర్చించనున్నారని విశ్వసనీయ సమాచారం.

ఈ సమావేశాన్ని ఏపీలో ఎన్డీయే కూటమి పార్టీలతో పాటు తెలంగాణలో కాంగ్రెస్, బీజేపీలు స్వాగతిస్తున్నాయి. ఇరు రాష్ట్రాల మధ్య మంచిసంబంధాల ఏర్పాటు ద్వారా జలవనరుల సమస్యలు పరిష్కారమవుతాయని ఆశిస్తున్నారు. కానీ వైయస్సార్ కాంగ్రెస్ పార్టీ (ఏపీ), భారత్ రాష్ట్ర సమితి (తెలంగాణ) మాత్రం ఈ పరిణామాలను జీర్ణించుకోలేకపోతున్నాయి. ముఖ్యంగా బీఆర్ఎస్ పార్టీ గతంలో కృష్ణా, గోదావరి నీళ్ల అంశాలను ‘తెలంగాణ సెంటిమెంట్‌’గా మలచి రాజకీయ లబ్ధి పొందిన సందర్భాలు ఉన్నాయి.

ప్రస్తుతం కేంద్రం, రెండు రాష్ట్రాల ప్రభుత్వాల మధ్య పరస్పర సహకార భావన ఉండటం వల్ల ఈ భేటీ ఎంతో ఫలప్రదంగా మారే అవకాశాలున్నాయి. బనకచర్ల ప్రాజెక్టుపై చర్చ కాకపోయినా, కృష్ణా - గోదావరి జలాల వినియోగంపై అవగాహనకు రావడం, సంధిగా ఒప్పందాలకు దారితీయడం రెండు రాష్ట్రాలకు ఎంతో మేలుకలిగించే అంశం.

ఇదే సమయంలో ప్రజలకు నిత్యజీవితంలో ఎక్కువ ప్రభావం చూపే నీటి సమస్యను రాజకీయ విమర్శలకు బలిచేయకుండా, పరస్పర నమ్మకం, సహకారంతో పరిష్కరించడానికి ఇరు ముఖ్యమంత్రులు చేసిన ఈ ప్రయత్నం అభినందనీయమైనది.

ఈ సమావేశం తర్వాత జలవనరుల పంపకాల విషయంలో స్థిరమైన విధానం రూపొందితే అది తెలుగు రాష్ట్రాల ప్రజలకు ఒక కొత్త జలసంధికాలంగా నిలవనుంది.