జూబ్లీహిల్స్‌ ఉపఎన్నికపై హాట్‌ న్యూస్

జూబ్లీహిల్స్ అసెంబ్లీ నియోజకవర్గం ఎమ్మెల్యే మగంటి గోపీనాథ్ మృతి చెందడంతో ఖాళీ అయిన ఈ స్థానం కోసం రాబోయే ఉపఎన్నికపై ఆసక్తికర పరిణామాలు చోటుచేసుకుంటున్నాయి. గోపీనాథ్‌ భర్తీకి ఆయనకు చెందిన భారత్‌ రాష్ట్ర సమితి (బీఆర్ఎస్) పార్టీ, సానుభూతి ఓట్లను దృష్టిలో ఉంచుకుని, ఆయన భార్యను బరిలోకి దింపే అవకాశాలు ఉన్నాయని తెలుస్తోంది.

ఈ సీటు కోసం అధికార కాంగ్రెస్‌ పార్టీ, ప్రతిపక్ష బీఆర్ఎస్ మధ్య ప్రధాన పోరు ఉండనుంది. 2023 ఎన్నికల్లో హైదరాబాద్‌లో ఒక్క సీటు కూడా గెలుచుకోలేకపోయిన కాంగ్రెస్, ఎమ్మెల్యే లాస్య నందిత రోడ్డు ప్రమాదంలో మరణించడంతో జరిగిన సికింద్రాబాద్‌ కాంటోన్మెంట్‌ ఉపఎన్నికలో విజయం సాధించింది. ఆ విజయంతో ఉత్సాహంగా ఉన్న కాంగ్రెస్, ప్రతిష్టాత్మకమైన జూబ్లీహిల్స్‌ సీటును చేజిక్కించుకోవాలని లక్ష్యంగా పెట్టుకుంది.

సీఎం రేవంత్‌రెడ్డి సినీ నటుడు చిరంజీవిని స్వయంగా కలసి పోటీ చేయమని ఆహ్వానించినట్టు సమాచారం. చిరంజీవి గతంలో ప్రాజా రాజ్యం పార్టీని స్థాపించి, అనంతరం కాంగ్రెస్‌లో విలీనం చేసి, యూపీఏ ప్రభుత్వంలో కేంద్ర మంత్రిగా పనిచేశారు. చిరంజీవి నిరాకరిస్తే, మరో స్టార్‌ హీరో నాగార్జునను బరిలోకి దింపే ఆలోచన కాంగ్రెస్‌ నేతలలో ఉన్నట్లు ప్రచారం రాజకీయ వర్గాలలో జోరుగా సాగుతుంది. జూబ్లీహిల్స్‌లో ఎక్కువ మంది సినీ ప్రముఖులు, ముఖ్యంగా ఆంధ్రా సెటిలర్లు నివసించడం కాంగ్రెస్‌కు అనుకూలంగా మారవచ్చని అంచనా.

ఇక కాంగ్రెస్‌లోనుంచి మాజీ క్రికెటర్‌ మహ్మద్‌ అజహరుద్దీన్‌, నవీన్‌ యాదవ్‌ పేర్లు కూడా రేసులో వినిపిస్తున్నాయి. ముందు ఎన్నికల్లో పరాజయం చెందినా, ఇటీవల అజహరుద్దీన్‌, రాహుల్‌ గాంధీ, సోనియా గాంధీలను కలసిన ఫోటోలు పంచుకున్నారు. నవీన్‌ యాదవ్‌ సినీ పరిశ్రమతో ఉన్న బలమైన సంబంధాల వల్ల గుర్తింపు పొందారు.

అంతిమంగా అభ్యర్థి ఎంపికపై తుది నిర్ణయం కాంగ్రెస్‌ హైకమాండ్‌ తీసుకోనుంది. ఉపఎన్నిక తేదీ ప్రకటించిన తర్వాతే అభ్యర్థి పేరును అధికారికంగా ప్రకటించే అవకాశం ఉంది.